Gernikako astelehenak

Gernikan dago Euskadin geratzen diren merkatu tradizional urrietako bat; 650 urtetik gorako historia du, Gernika hiribildu gisa fundatu zen unean hasi baitzen. Sorrerako Hiri Gutunak astean behin merkatu bat egiteko pribilegioa eman zion Gernikari, 1366 urtean. Gaur egun, Busturialde osoko nekazaritza-produktuen erosle eta saltzaileak biltzen dira Gernikako merkatuan astelehenero. Astelehen guztietan giro koloretsu eta alaitsua nagusitzen da, eta orain dela gutxira arte, gainera, eguna zesta puntako partidekin amaitzen zen Jai-Alai frontoian. Pilotari profesional askoren ustez, berau da munduko frontoirik onena. Eraikin hau Bizkaiko XX. mendeko arkitektura modernoaren adierazle nagusietako bat da, Secundino Zuazoren maisulan bat, hain zuzen ere.​

Antzinako esaera batek dioenez, Gernikako astelehena gozatzeko egun bat da:

"lunes gernikes, kolperik ez"​

​

Urriko Lehenengo Asteleheneko Feria

​

Euskadiko piriniotar arrazako Lehiaketa "Gernikako Urriko Lehenengo Asteleheneko" abere-ferian ospatzen da. Lehiaketa honetan 100 abelburu inguruk hartzen dute parte hainbat mailatan banatuta.

Bi egunetan zehar Gernika-Lumo lehenengo sektoreko erreferentzia bilakatzen da eta ganadutegietan gero eta garrantzi handiago duen haragirako arrazako erakusleiho, esnerako ganaduari lekua kenduta.

Egitaraua igandean hasten da, lehiaketa antolatuta dagoen bederatzi ataletako abelbururik onenak aukeratuz. Bi epaile jakintsuk baloratzen dute, besteak beste, abereen morfologia eta hautatzen dituzte hiru onenak.

Astelehenean, lehiaketaren antolatzaileek behirik eta zezenik onenak aukeratzen dituzte sailkatutako onenen artean; gero, inseminazioko emerik onena eta ganadutegirik onena ere bai.

Feriako bi egunetan zehar, label kalitateko arraza honen haragia dastatzeko aukera dago.

Igandean sei abel-lepo erretzen dira bertan eta, astelehenean, 2.500 txahal saiheski 2.500 errazio banatzen dira.

Gainera, bisitariek hainbat produktu erosteko aukera izango dute ganadua babesteko karpa erraldoiaren inguruen kokaturiko saltokietan: sagardoa, euskal pastela, gazta eta eskulanetakoak.​

​​​

​Urriko azken astelehena

​​​Urriaren Azken Astelehenean urteko nekazaritza-azoka garrantzitsuena egiten da Gernikan, Euskal Herriko azoka garrantzitsuenetako bat. Euskal merkatu tradizional bat da, hiriko erdigune osoa hartzen duena eta urtero milaka pertsona biltzen dituena, salgai dauden produktuen kalitateak eta eguneko jai-giroak erakarrita. Ekoizleek erdiguneko kaleetatik banatzen dituzte euren produktuak, adibidez: Artekalea, Industria, Juan Calzada, San Juan… Guztira, egun horretan 900 postu inguru jartzen dira, astelehen guztietako merkatuko postu finkoak eta postu ibiltariak barne sartuta.

Azokaren puntu erakargarrietako bat gazta, Bizkaiko txakolin, ezti, lore, fruta eta barazkien lehiaketa eta erakusketa dira. Epaimahaiak goizeko lehen orduan sailkatzen ditu produktuak, eta hortik aurrera erakusleek euren produktuak sal ditzakete. Sarien banaketa “Merkurio Iturri” ezagunaren aurrean egin ohi da, eguerdi aldera. Horren ostean, hain ikusmin handia sortzen duen gazta irabazlearen enkantea egiten da. Enkante hau ongintzako xedeekin egiten da, eta oso ezaguna da herritarren artean, zeren eskaintzak milaka eurokoak izatera iristen baitira.

Egun honetan, bertoko beste produktu asko saltzen dira, hala nola sagardoa, ogia, gozokiak, erroskilak, patea, kontserbak, kalitatezko Eusko Labela duten produktuak, nekazaritza ekologikoko produktuak…

Halaber, bertaratzen diren pertsonek bertatik bertara ikus ditzakete euskal eskulangintzako produktuak lantzeko prozesua eta nekazaritzako makineriaren erakusketa. Bertsolariek eta kalejirek eguna alaitzen dute. Programak kirol jarduerak ere hartzen ditu barne, hala nola zesta puntako eta esku pilotako partidak. Giro ona eta jaia ez dira amaitzen gaueko ordu txikiak arte

Guía para disfrutar del Último Lunes de Octubre: